پاکستانی کرکٹرز محمد عامر اور عماد وسیم نے منگل کے روز “دی ہنڈریڈ 2025” سیزن کے لیے ناردرن سپرچارجرز سے معاہدہ کر لیا ہے۔
میڈیا رپورٹس کے مطابق، یہ دونوں کھلاڑی آسٹریلیا کے بین ڈورشوئس اور نیوزی لینڈ کے مچل سینٹنر کی جگہ ٹیم میں متبادل کے طور پر شامل کیے گئے ہیں۔
اس سے قبل یہ چہ مگوئیاں جاری تھیں کہ چونکہ اس ٹورنامنٹ میں شامل کئی ٹیموں کی ملکیت بھارتی شخصیات کے پاس ہے، اس لیے پاکستانی کھلاڑیوں کو لیگ میں شرکت سے محروم رکھا جائے گا۔
ناردرن سپرچارجرز یکم اکتوبر سے بھارتی میڈیا کمپنی “سن گروپ” کے کنٹرول میں آ جائے گی، جس کے باعث پاکستانی کرکٹرز کی شرکت پر سوالات اٹھے تھے۔
رواں سال کے اوائل میں یہ حیران کن انکشاف بھی سامنے آیا تھا کہ مارچ میں منعقدہ ڈرافٹ میں کسی پاکستانی کھلاڑی کو منتخب نہیں کیا گیا، حالانکہ پچھلے سیزنز میں متعدد پاکستانی کھلاڑیوں نے لیگ میں شرکت کی تھی۔
اس صورتحال پر مختلف قیاس آرائیاں کی گئیں، جن میں یہ نکتہ نمایاں تھا کہ چار ٹیموں کے مالکان بھارت سے تعلق رکھتے ہیں جبکہ دو ٹیموں کی ملکیت بھارتی نژاد امریکی افراد کے پاس ہے، اور ممکنہ طور پر اسی پس منظر کے باعث پاکستانی کھلاڑیوں کو نظر انداز کیا گیا۔
تاہم انگلینڈ اینڈ ویلز کرکٹ بورڈ (ای سی بی) نے ان تحفظات کو مکمل طور پر رد کرتے ہوئے واضح کیا تھا کہ پاکستانی کھلاڑیوں کو ٹورنامنٹ سے باہر رکھنے کا کوئی ارادہ نہیں ہے۔
کرکٹ ماہرین کے مطابق، پاکستانی ٹیم کے ویسٹ انڈیز کے دورے، متحدہ عرب امارات میں سہ فریقی سیریز، حالیہ ٹی ٹوئنٹی کارکردگی میں کمی، اور پچھلے سیزن میں شاہین شاہ آفریدی اور نسیم شاہ کے اچانک دستبردار ہونے جیسے عوامل بھی پاکستانی کھلاڑیوں کے نہ چنے جانے کی ممکنہ وجوہات میں شامل تھے۔
اب محمد عامر اور عماد وسیم کی شمولیت سے ناردرن سپرچارجرز کی ٹیم مزید مستحکم ہو گئی ہے، جس میں انگلینڈ کے اسٹار آل راؤنڈر بین اسٹوکس بھی شامل ہیں، اگرچہ اسٹوکس نے حالیہ کندھے کی سرجری کی وجہ سے اس سیزن میں شرکت نہ کرنے کا فیصلہ کیا ہے۔
