اسلام آباد / لندن — برطانیہ نے پاکستانی طلبہ اور ملازمت کے خواہشمند افراد کے لیے ویزا سسٹم میں بڑی تبدیلی کا اعلان کر دیا ہے۔ 15 جولائی سے برطانیہ جانے والے بیشتر طالب علموں اور ورکرز کو اب پاسپورٹ میں اسٹیکر ویزا کی ضرورت نہیں ہوگی بلکہ انہیں ڈیجیٹل eVisa جاری کیا جائے گا۔
برطانوی حکومت کی جانب سے جاری بیان کے مطابق یہ eVisa ایک آن لائن ریکارڈ ہوگا جو کسی بھی فرد کی امیگریشن اسٹیٹس اور شرائط کا ثبوت ہوگا۔ یہ ریکارڈ یوکے وی آئی (UKVI) آن لائن اکاؤنٹ کے ذریعے حاصل کیا جا سکے گا۔
اہم نکات:
eVisa سسٹم ویزا کے عمل کو زیادہ آسان، محفوظ اور ڈیجیٹل بنا رہا ہے۔
امیدوار اپنا پاسپورٹ محفوظ رکھ سکیں گے اور بار بار جمع کروانے کی ضرورت نہیں رہے گی۔
یہ تبدیلی صرف ویزے کی شکل کو متاثر کرتی ہے، امیگریشن اسٹیٹس یا قیام کی شرائط میں کوئی تبدیلی نہیں ہوگی۔
کن افراد کو eVisa ملے گا؟
یہ نیا سسٹم فی الحال درج ذیل ویزا کیٹیگریز پر لاگو ہوگا:
تمام طلبہ (بشمول 11 ماہ کی شارٹ ٹرم اسٹڈی)
گلوبل بزنس موبیلیٹی (جیسے سینئر یا اسپیشلسٹ ورکر، گریجویٹ ٹرینی، سروس سپلائر وغیرہ)
گلوبل ٹیلنٹ
انٹرنیشنل اسپورٹس پرسن
اسکلڈ ورکر (بشمول ہیلتھ اینڈ کیئر ورکرز)
ٹیمپریری ورک (چیریٹی، کریئیٹو، انٹرنیشنل ایگریمنٹ، مذہبی ویزے وغیرہ)
یوتھ موبیلیٹی اسکیم
پاسپورٹ اور eVisa لنک:
امیدوار اپنے UKVI اکاؤنٹ کو اپنے سفری دستاویز (پاسپورٹ) سے لنک کر سکیں گے، جس سے ان کی بین الاقوامی سفری سہولت بڑھے گی۔ وہ اپنا ویزا اسٹیٹس آجر یا کرایہ دار جیسے تیسرے فریق کو آن لائن دکھا سکیں گے۔
کیا اب بھی اسٹیکر ویزا جاری ہوگا؟
اگر کوئی امیدوار ڈپینڈنٹ کے طور پر یا اسٹڈی/ورک کے علاوہ کسی اور ویزا (جیسے وزیٹر ویزا) کے لیے درخواست دے رہا ہے تو اسے ابھی بھی فزیکل اسٹیکر ویزا ملے گا۔
جن کے پاس پہلے سے جاری شدہ اور کارآمد اسٹیکر ویزے ہیں، انہیں کوئی کارروائی کرنے کی ضرورت نہیں۔
برطانوی ہائی کمشنر کا بیان:
پاکستان میں برطانوی ہائی کمشنر جین میریٹ کا کہنا تھا:
“یہ تبدیلیاں طلبہ اور ورکرز کے لیے برطانوی ویزا سسٹم کو آسان اور جدید بنائیں گی۔ eVisa سے وقت کی بچت ہوگی اور پاسپورٹ محفوظ رہیں گے۔”
یہ قدم برطانوی امیگریشن نظام کو مکمل طور پر ڈیجیٹل بنانے کی جانب اہم پیش رفت ہے، جو جلد ہی تمام ویزا کیٹیگریز پر لاگو ہوگا
